Elurra egin du berriro. Aurreko geruza zaharraren gainean zenbait lekutan, hala nola Aralarren, Saioan, Orreaga gaineko gailurretan... eta aurreko geruza hori jada urtua zen mendi gainetan, beste zenbait  lekutan. Beraz, aukera dugu berriro ere etxe inguruko gailurretan  mendiko eskia egiteko. Non? Oinarrizko gida bat prestatu dugu, mendebaldetik ekialdera, jarduera honetarako egokiak diren zenbait proposamen azaltzeko. Mapa interaktibo baten bidez kokatu ditzakezu mendiok, bakoitza bere fitxarekin.

Imanol Amundarain atalluarrak Paineko Erdiko Dorreko 'Hegoafrikako bidea' (A4/5.10) eskalatu du era askean, Txileko Patagonian, Cedar Christensen eta Tyler Karow estatubatuarrekin batera. 

Amundarain, Christensen eta Karowentzat eskalada bakoitza, baita gogorrena ere, festa da. «Guretzat, eskalatzea festa da. Horregatik, musika, ardoa, janari goxoa eramaten ditugu beti hormara. Hor negoziazio gogorrak izan genituen: zenbat ardo igoko dugu? Yosemiten eskalatu izan dugunean, bakoitzarentzat litro eta erdi igo izan dugu, zahato bete ardo. Beraz, 15 egunerako aurreikuspena eginda, bost litro igogenituenazkenean.Ondorioz, murrizketa gogorrak aplikatu behar izan genituen, tontorrerako zahato bat gutxienez bermatzeko». 

Eskalada eta festa, festa eta es- kalada, goi mailako jarduera osatu dute hiru eskalatzaileek: Hego- afrikako bidearen bigarren eskalada era askean. Kapsula estiloan osatu zuten bidea. Lehen bi egunetan hormaren beheko zatiko luzeak eskalatu, sokak finkatu, eta dorrearen magalean egin zuten lo. Lehen portaledge-a edo kanpalekua finkatu zutenean, orduan sartu ziren bete-betean horman. Zehaztasun guztiak Ardoz balitutako festa Paineko Dorrean erreportajean topatuko dituzu.

Azken asteotan jarduera gogor eta ikusgarriak izan dira Alpeetan. Batetik, Charles Dubouloz, Symon Welfringer eta Clos Paulin alpinistek osatutako sokadak Jorasses iparreko ‘Directissime’ bidea (1.200 m, ABO-) eskalatu du neguan aurrenekoz. Lerro hori Patrick Gabarrou eta Hervé Bouvard frantziarrek zabaldu zuten duela ia 40 urte, eta gerozko  urteotan ez du inork eskalatu neguan. Dubouloz, Welfringer eta Paulinek, gainera, era askean osatu dute eskalada, horman bost egun eta lau gau  igaro ondoren.

Bestalde, Thibault Sibille mendiko gidariak Grand Pic de Belledonne mendiko ‘Rébuffat’ bidea eskalatu du neguan lehen aldiz.

2024ko Mendi Film Bizkaia Ternua bekaren 4. aldia aurkeztu berri dute Mendi Film jaialdiak, Bizkaiko Foru Aldundiak eta Ternuak. Mendiko kulturarekin lotutako zinemagintza eta ikus-entzunezkoen ekoizpen munduan zuzendari gazteak eta zuzendari berriak sustatzeko helburua du bekak. Hautatutako proiektua garatzeko 10.000 euroko diru laguntza eta aholkularitza programa bat jasoko ditu irabazleak.

Erronkaribarreko XI. Neguko Triatloia jokatu da pasa den larunbatean Izaban eta Larra-Belaguako eski pistetan, elur faltagatik hilabete pasatxo atzeratu ondoren. Enara Oronoz eta Xabier Orduna nafarrak gailendu dira proban. Modalitate honetako Euskadiko eta Nafarroako Txapelketa ere izan da proba.