udako oporraldien ostean, indarberriturik gatoz euskal musikaren inguruan gertatzen den guztia —argitalpen berriak, albisteak, kontzertuak...— zuenganatzeko asmoz. Ez zaigu lanik faltako, urtero bezala datozen hilabeteak, Durangoko Azoka igaro bitartean, oso emankorrak izango baitira euskal diskogintzan. Hain zuzen, hasi dira jada lehen lan berriak argitaratzen –Txost! eta Neomak taldeenak, baita Fermin Muguruzak zuzendutako 'Black is Beltza: Ainhoa' filmeko soinu banda ere—, eta zenbait diskoetxek eman dute ezagutzera udazkeneko argitalpenen zerrenda. Horietako batzuk bildu ditugu buletin honetan jasotako albistean. Hurrengo asteetan emango dizuegu nobedade gehiagoren berri.
Bitartean, errepara diezaiogun dagoeneko entzungai eta ikusgai dagoenari. Esaterako, MICEren lan berriaren single berriari. Irailaren 29an argitaratuko du Miren Narbaizak bere bakarkako proiektuaren hirugarren abesti bilduma, ‘Lautada, eta bigarren aurrerapen gisa "Inor begira izanda ere" abestia zabaldu du, bi bertsiotan: diskoan jasotakoa eta bideokliperako zuzenean grabatutakoa.Hasieran iragarritakoa baino beranduago bada ere —zabaldu bezperan bertan behera utzi zuten estreinaldia—, Zetak eta Bomba Estéreoren arteko kolaborazioaren bideoklipa iritsi da aste honetan, ""Zoriontasuna (la vida es de verdad)" abestiarena-. Maraca Diablo taldeak ere bideoklip berria aurkeztu du, aurten argitaratutako diskoan jasotako "Milia Lasturko" kantarena. Eta azkenik, lehen aipatutako Fermin Muguruzaren filmerako Broken Brothers Brass Bandek egindako moldaketa ere —"Nicaragua sandinista"— aipagarria da oso.
Dena den, atarian sartuta udan zehar argitaratutako kanta eta bideoklip berri gehiago aurkitu dituzu.
Pierre Balacey 'Balatx' musikariak (Xutik, Fizt & Furiuz) egin digu ikasturte honetako lehen abesti zerrenda, eta datorren astean itzuliko da 'Dunbala' podcasta. Bitartean, oraindik ez baduzu egin, Lumi taldeari egindako elkarrizketa entzun dezakezu.
